Opið bréf til Leoncie Yðar hátign. Mig langar til að benda yður á mikinn misskilning sem þér hafið oft haldið fram, eða það að þér sé mismunað hér á landi vegna þess að Íslendingar séu rasistar. Íslendingar eru mjög langt frá því að vera rasistar, erum þvert á móti mjög hrifin af útlendingum. Fjöldinn allur af íslenku kvenfólki hikar nú t.d. ekki við að hoppa upp í rúmið með alls konar útlendingum sem koma hingað (sérstaklega þó kannski frönskum sjóurum). Þetta er meira að segja svo áberandi, að Flugleiðir hafa auglýst sérstakar "one night stand" ferðir hingað. Ef þér trúir mér ekki, bið ég yður að vinsamlegast líta inn á Píanóbarinn einhverntíman fljótlega.    Íslenskir karlmenn eru jafnvel framar landsystrum sínum í þessum efnum. Þeir hafa svo mikið álit á asískum konum að fjöldinn af þeim er tilbúinn að ferðast hálfa leiðina yfir hnöttinn til að finna sér konur í Tælandi og Filipseyjum. Sumir eru meira að segja svo sannfærðir um ágæti tælenskra kvenna, að þeir eru tilbúnir að panta þær úr bækling, þó þeir þekki þær meira að segja ekki neitt. Þess vegna er það nú af og frá að Íslendingar séu rasistar. Það er hins vegar mikið rétt að yður hefur verið gróflega mismunað hér á landi, og þér hafið ekki fengið þá virðingu sem tónlistarsnillingi eins og yður sæmir. Ástæðan er bara sú að Íslendingar, þó þeir séu ekki rasistar, eru með mikla og rótgróna fordóma gagnvart kóngafólki. Þar sem þér eruð prinsessa, verðið þér illa fyrir barðinu á þessu. Ísendingar voru nefnilega undir danska kónginum í mörg hundruð ár og þurftu að þola af honum kúgun og valdníðslu. Við vorum t.d. pínd til að kaupa ormétið mjöl af dönskum kaupmönnum á okurverði svo öldum skipti. Þetta hafa Íslendingar aldrei alveg fyrirgefið, og hata þar af leiðandi allt kóngafólk, þar með talið indverskar prinsessur. Það voru sem sagt mikil mistök í markaðssetningu yðar að upplýsa þjóðinni það að þér væruð prinsessa. Ef sú mistök hefðu ekki verið gerð, get ég lofað yður að þér væruð stærsta poppstjarna Íslands öllum væri sama um Birgittu Haukdal. p.s. ég er þrátt fyrir mikla aðdáun á yður er ég samt sérlega móðgaður í yðar garð. Mér finnst að þér hafið mismunað illa gagnvart mér, þar sem þér hafið hótað t.d. Sigurjóni Kjartanssyni og Beturokk kærum og úthrópað þau sem rasista, en aldrei sýnt mér neina athygli. Þetta finnst mér gróf mismunun í minn garð, sérstaklega þar sem ég er rasisti með endemum. Til marks um hversu mikill rasisti ég er, get ég staðfest að ég hef látið út úr mér alls konar rasista athugasemdir af grófustu gerð, eins og að Ameríkanar séu ekkert sérstaklega grönn þjóð, Spánverjar séu smámæltir, Frakkar kunni ekki að segja H, Japanir kunni ekki að segja L, Bretar séu ekkert góðir kokkar, Ítalir séu ekkert góðir að skipuleggja, Þjóðverjar hafi ekkert sérstakan húmor og að mér finnist Brest kvenfólk ekkert voðalega fallegt. Vinsamlegast sendið mér því kæru, eða að minnsta kosti hótun um kæru, svo ég í það minnsta viti að yður sé ekki alveg sama um mig. Aðdáunar og baráttukveðjur - Rökkvi Vésteinsson