Dark Angel Season 1 **** af fimm mögulegum Fimm spólur, hver milli 3 og 4 tímar á lengd Einnig þekkt sem: James Cameron´s Dark Angel Leikstjórar: Allan Kroeker David Nutter Michael Ray Rhodes Aðalhlutverk: Jessica Alba : Max Guevara Michael Weatherly : Logan Cale/Eyes Only John Savage : Donald Lydecker Alimi Ballard : Herbal Thought Richard Gunn : Sketchy J.C. MacKenzie : Normal Valarie Rae Miller : Original Cindy Þetta er aldeilis skemmtilegur þáttur að fá hingað á klakann. Það er nú reyndar ekki langt síðan Stöð 2 sýndi þættina þannig að þeir eru ferskir í minni margra en eru engu að síður frábærir. Þættirnir gerast í Seattle í Bandaríkjunum árið 2019 nokkrum árum eftir að ráðist hafði verið á landið með rafbylgjuvopnum (Electro Magnetic Pulse) sem eyðilögðu infrastrúktúr þess og gerðu það að þriðja heims ríki. Lögreglan er á öllum götuhornum, hverfum skipt með girðingum og vopnaðir verðir á check points út um allt. Aðalsöguhetjan, Max, er genabreytt stelpa sem er sterkari en allir menn, stekkur hæð sína í fullum herklæðum, notar augun eins og kíki og er líka með bad ass attitude svo maður gleymi nú ekki að minnast á að hún er helvíti foxý! En aftur að sögunni. Max er genabreyttur hermaður sem bandaríkjastjórn var að rækta þegar ráðist var á landið og það lagt í rúst. Hún ásamt 11 fleiri genabreyttum krökkum (hópurinn kallast X5 í þáttunum) sleppa og reyna að komast af í lífinu. Max er búin að koma sér vel fyrir, vinnur sem hjólasendill á daginn en þjófur ákvöldin þegar við kynnumst henni. Í byrjun fyrsta þáttar hittir hún Logan sem er blaðamaður sem er á fullu að fletta ofan af spillingu í stjórnkerfinu með rannsóknarblaðamennsku og miklum tæknibúnaði. Hann ákveður að hjálpa henni að hafa upp á hinum krökkunum í X5 hópnum ef hún hjálpar honum að láta sannleikinn koma í ljós um spillingu í landinu. Þetta er fínir þættir ef maður kemst framhjá genabreytingadæminu sem ég er ekki viss um að geti staðst nákvæma vísindalega skoðun. En ég beini svoleiðis pælingum til Rökkva. Þættirnir eru fínt skrifaðir, með skemmtilegum bardagaatriðum þar sem Max hoppar til og frá þegar hún lemur vonda fólkið. Plottið er gott og sífellt er verið að vísa í það sem gerðist í fyrri þáttum og eitthvað að gerast sem skýrist síðar. Sárasjaldan eru atriði sem ekki standast með tilliti til þess sem áður hefur gerst sem gerir þetta betra en margt sem maður sér í sci-fi. Svo er líka góður húmor í þáttunum og er það helst Normal sem sér um þann part en þó eru líka kynntir til sögunnar fleiri húmoristar og svo fá aðalleikararnir líka fínar línur. Max er flott og Jessica Alba er fín í þessu hlutverki. Fyrir þá sem ekki vita hver þetta er þá er þetta foxý gellan úr Idle Hands en er núna komin með síðara hár :þ Logan er vel skrifaður og skemmtilegur karakter þó það sé ekkert allt of mikið chemistry á milli hans og Max. Aukapersónurnar eru misgóðar eins og gerist og gengur, Original Cindy er vinkona Max og er alveg ömurlega leiðinleg lesbísk stelpa sem sífellt talar um sig í þriðju persónu. Normal er eigandi sendlafyrirtækisins sem Max, Cindy og vinir þeirra vinna hjá og hann er frábær persóna, talar í sífellu um hvað The Great Communicator Georg Bush sr. hafi verið frábær forseti og er alveg ekta íhaldssamur plebbi. Aðal vondi kallinn er leikinn af John Savage sem lék Claude í Hair forðum daga. Hann er skemmtilegur vondi kall, ekki alveg vondur heldur er reynt að gera hann aðeins mannlegann og hann verður þá trúverðugri. Ég mæli hiklaust með þessum þáttum, góð saga, flott gella og greinilega eitthvað lagt í þættina eins og búast má við af Cameron. Sá sem skrifar þættina með honum skrifaði m.a. L.A. Law, Moonlighting (sem gerðu Bruce Willis frægan) og N.Y.P.D. Blue og starfaði með Cameron í gæðaræmunni Piranha 2 sem aðstoðarleikstjóri. Nauðsynlegt bjórmagn: Bara ein flaska